Byggðarráð

1285. fundur 10. ágúst 2026 kl. 14:00 - 15:15 í Ráðhúsinu

Nefndarmenn

Örn Arnarson formaður
Nína Axelsdóttir varaformaður
Viktor Ingi Jónsson aðalmaður

Starfsmenn

Unnur Valborg Hilmarsdóttir sveitarstjóri
Elín Jóna Rósinberg sviðsstjóri fjármála- og stjórnsýslusviðs

Fundargerð ritaði: Elín Jóna Rósinberg

Dagskrá

1.Forsendur fjárhagsáætlunar ársins 2027

Málsnúmer 2602081 Vakta málsnúmer

Lagt fram minnisblað vegna fjárhagsáætlunargerðar ársins 2027 og þriggja ára áætlunar áranna 2028-2030 fyrir sveitarsjóð og undirfyrirtæki.

Byggðarráð samþykkir samhljóða framlagðar forsendur með áorðnum breytingum og felur sveitarstjóra og sviðsstjóra fjármála- og stjórnsýslusviðs að hefja vinnu við gerð fjárhagsáætlunar í samræmi við það.

Meirihluti byggðarráðs leggur fram eftirfarandi bókun:
Meirihluti Framsóknar og annarra framfarasinna og Sjálfstæðismanna og óháðra leggur áherslu á að við gerð fjárhagsáætlunar ársins 2027 verði gengið út frá þeirri forsendu að gjaldskrár standi í stað á milli áranna 2026-2027.

Viktor Ingi lagði fram eftirfarandi bókun:
Minnihluti N-lista fagnar því að stefnt sé að því að gjaldskrár standi í stað milli áranna 2026-2027. Það er von listans að sú aðgerð leiði hvorki af sér hækkanir í stærri skrefum síðar á kjörtímabilinu né auknar lántökur í komandi fjárhagsáætlun.

2.Beiðni um launalaust leyfi

Málsnúmer 2607059 Vakta málsnúmer

Lögð fram beiðni Fanneyjar Daggar Indriðadóttur um launalaust leyfi, dags. 28. júlí 2026. Beiðnin felur í sér frávik frá reglum um veitingu launalausra leyfa og er því lögð fyrir byggðarráð.

Byggðarráð samþykkir samhljóða beiðni Fanneyjar Daggar um launalaust leyfi frá upphafi skólaárs 2026 í eitt ár.

3.Eldur í Húnaþingi 2026

Málsnúmer 2607060 Vakta málsnúmer

Þakkir til skipuleggjenda.

Hátíðin Eldur í Húnaþingi fór fram dagana 20.-26. júlí sl. Byggðarráð færir skipuleggjendum hátíðarinnar og öllum þeim sem að framkvæmdinni komu, bestu þakkir fyrir vel unnin störf og vel heppnaða hátíð. Skipulag og framkvæmd öll var til fyrirmyndar og sveitarfélaginu til sóma.

4.Höfði - girðing

Málsnúmer 2607062 Vakta málsnúmer

Lagt fram minnisblað sviðsstjóra umhverfis-, veitu- og framkvæmdasviðs vegna girðingar um Höfða á Laugarbakka.

Um er að ræða girðingu umhverfis Höfðann á Laugarbakka og byggðina í syðri hluta þéttbýlisins. Byggðarráð tekur vel í erindið og vísar því til fjárhagsáætlunargerðar ársins 2027.

5.Verklagsreglur vegna framkvæmda - framkvæmdasamningar

Málsnúmer 2607015 Vakta málsnúmer

Reglurnar voru samþykktar á 2. fundi umhverfis- veitu- og framkvæmdaráðs. Lagðar fram til staðfestingar.

Byggðarráð samþykkir samhljóða framlagðar verklagsreglur vegna framkvæmda. Reglurnar skulu undantekningalaust gilda um öll verk yfir 2 millj. króna og þar sem því verður við komið um verk undir 2 millj. króna.

6.Mál til umsagnar: Breytingar á reglugerðum vegna einföldunar eftirlits mál nr. S-113/2026

Málsnúmer 2607054 Vakta málsnúmer

Lögð fram umsagnarbeiðni frá umhverfis,- orku- og loftslagsráðuneytinu um mál nr. S-113/2026 í samráðsgátt stjórnvalda, Breytingar á reglugerðum vegna einföldunar eftirlits.

Byggðarráð vísar til fyrri umsagna sinna um frumvarp til laga um einföldun regluverks og aukna skilvirkni eftirlits með hollustuháttum og mengunarvörnum, 582. mál, og um frumvarp til laga um Stofnun atvinnuveganna, 568. mál, báðar dagsettar 9. apríl 2026. Í báðum umsögnum var bent á að ekki lægi fyrir kostnaðarmat eða raunhæft mat á áhrifum breytinganna á fjárhag sveitarfélaga. Nú þegar lögin hafa verið samþykkt og reglugerðarbreytingar liggja fyrir til samráðs telur byggðarráð að sá ótti hafi, því miður, reynst á rökum reistur.

Yfirlitsskjal ráðuneytisins um breytingarnar sýnir að tiltekin verkefni sitja eftir hjá sveitarfélögunum sjálfum þrátt fyrir að bróðurpartur verkefna heilbrigðisnefnda flytjist til Umhverfis- og orkustofnunar. Í reglugerð um loftgæði lendir mat á loftgæðum, gerð aðgerðaráætlana og upplýsingagjöf til almennings á „sveitarstjórn" sjálfri, og sveitarfélög halda áfram hlutverki sínu við hávaðakortlagningu samkvæmt reglugerð um kortlagningu hávaða. Í reglugerð um varnir gegn mengun vatns er í fyrsta sinn kveðið með skýrum hætti á um að sveitarfélög ákvarði sjálf verndarsvæði vatnsbóla. Eftirlit með umgengni og þrifnaði utanhúss samkvæmt reglugerð um meðhöndlun úrgangs, og skráning eldri mengaðra svæða samkvæmt reglugerð um mengaðan jarðveg, flytjast einnig beint til sveitarstjórna. Loks fellur heimild til að fjarlægja lausamuni og bílflök samkvæmt reglugerð um hollustuhætti brott með öllu, sem þýðir að sveitarfélög þurfa sjálf að setja sér samþykktir á grundvelli 59. gr. laga nr. 7/1998, haldi þau heimildinni yfirhöfuð.

Byggðarráð leggur höfuðáherslu á að ekkert í fyrirliggjandi gögnum bendi til að fjármunir fylgi þessum verkefnum. Í minnisblaði Heilbrigðiseftirlits Norðurlands vestra frá 18. júní 2026 kemur fram að óljóst sé hvort gjaldtökuheimildir fylgi mörgum þessara verkefna og að umtalsverð vinna og kostnaður fylgi yfirfærslu gagna, kostnaður sem sveitarfélögin munu á endanum bera. Í nefndaráliti meirihluta umhverfis- og samgöngunefndar Alþingis um frumvarpið, þskj. 1355/157, er viðurkennt að hlutverk heilbrigðiseftirlits í almannavörnum sé veigamikið, sér í lagi hvað varðar neysluvatn og vernd vatnsbóla, en spurningum um hvernig það hlutverk verði fjármagnað eftir breytinguna er ósvarað.

Reynslan af sambærilegum verkefnaflutningum gefur fullt tilefni til tortryggni. Samband íslenskra sveitarfélaga hefur bent á, í umsögn um fjárlagafrumvarp 2025, að kostnaður vegna þjónustu við fatlað fólk, sem flutt var til sveitarfélaga árið 2011, hafi vaxið umtalsvert meira en þær tekjur sem fylgdu málaflokknum. Í nýlegra dæmi, frá 25. júní 2026, sakaði stjórn sambandsins ríkið um að standa ekki við samkomulag frá 19. mars 2025 um fjármögnun þjónustu við börn með fjölþættan vanda, með einhliða þrengingu á þeim hópi sem fjármögnunin átti að ná til. Byggðarráð telur að þessi endurtekna reynsla kalli á að skýrt kostnaðarmat og bindandi fjármögnun liggi fyrir áður en umræddar reglugerðarbreytingar taka gildi, ekki eftir á, þegar sveitarfélög standa frammi fyrir orðnum hlut.

Byggðarráð gerir jafnframt athugasemd við að umsagnarfrestur um jafn umfangsmikið mál, á sjötta tug reglugerða sem breytt er í einu máli, sé frá 13. júlí til 17. ágúst, á hefðbundnum sumarleyfistíma. Slíkt hlýtur að vera gert með vilja og vitund, og ásetningurinn þar á baki er, að mati byggðarráðs, ámælisverður. Heilbrigðiseftirlit Norðurlands vestra hefur samkvæmt eigin minnisblaði aðeins 3,5 stöðugildi að meðaltali og þarf samhliða að sinna óbreyttri lögbundinni þjónustu og undirbúa yfirfærslu mála. Byggðarráð telur að þessi tímasetning gefi hvorki heilbrigðiseftirlitinu né sveitarfélögunum raunhæft svigrúm til vandaðrar umfjöllunar um jafn afdrifaríka breytingu á verkaskiptingu ríkis og sveitarfélaga.

Byggðarráð Húnaþings vestra ítrekar afstöðu sína úr fyrri umsögnum um 582. og 568. mál og krefst þess að fyrir liggi skýrt kostnaðarmat og tryggð fjármögnun þeirra verkefna sem sitja eftir hjá sveitarfélögum áður en reglugerðarbreytingarnar taka gildi.

7.Mál til umsagnar: Hvítbók um byggðamál mál nr. 104/2026

Málsnúmer 2606059 Vakta málsnúmer

Lögð fram umsagnarbeiðni frá innviðaráðuneytinu um mál nr. 104/2026 í samráðsgátt stjórnvalda, Hvítbók um byggðamál.

Byggðarráð Húnaþings vestra gerir í meginatriðum ekki athugasemdir við þá framtíðarsýn og meginmarkmið sem sett eru fram í hvítbókinni um jafnt aðgengi að þjónustu, jöfn tækifæri til atvinnu og sjálfbæra þróun byggða um land allt. Ráðið fagnar áherslu á að tryggja blómlegar byggðir, öfluga byggðakjarna og jöfnun lífskjara landsmanna óháð búsetu.

Ráðið vill hinsvegar benda á að í samanburði við eldri byggðaáætlun fyrir árin 2022-2036, mál nr. 1383 í þingskjölum Alþingis, gætir verulegs misræmis á milli þeirra miklu krafna sem nýja hvítbókin gerir til sveitarfélaga og þeirrar fjármögnunar sem stefnunni fylgir. Í eldri áætluninni var gert ráð fyrir tæpum 4,39 milljörðum króna í framlög til fimm ára aðgerðaáætlunar en nýja hvítbókin gerir ráð fyrir 4,0 milljörðum króna fyrir fimm ára tímabilið 2027-2031, sem felur í sér raunlækkun á fjárframlögum ríkisins til byggðamála. Telur ráðið því nauðsynlegt að fjárframlög til byggðamála verði aukin til samræmis við ný og flókin verkefni sem sveitarfélögum er ætlað að bera ábyrgð á í reynd.

Ráðið lýsir yfir þungum áhyggjum af áformuðum breytingum á skipulagi ríkisstofnana, svo sem sameiningu sýslumannsembætta á landsvísu frá og með árinu 2027 samkvæmt lögum nr. 9/2026, og þeirri ríku áherslu sem lögð er á stafrænar lausnir sem meginleið til að brúa þjónustubil ríkisins á landsbyggðinni. Sú þróun vinnur gegn yfirlýstum markmiðum eldri áætlunar um að fjölga opinberum störfum á landsbyggðinni og jafna búsetugæði með viðveru opinberra starfsmanna. Ráðið áréttar að stafræn tækni getur aldrei komið að fullu í stað persónulegrar grunnþjónustu og óttast að miðstýring og fækkun ríkisstarfa í héraði muni veikja atvinnulíf og stjórnsýslu í sveitarfélögum á landsbyggðinni.

Þá vill ráðið benda á að boðuð gerð þróunaráætlana fyrir stærri borgarsvæði og nýjar áherslur í svæðisskipulagi mega aldrei þrengja að stjórnarskrárbundnu skipulagsvaldi sveitarfélaga, sem tryggt er í 1. mgr. 78. gr. stjórnarskrár lýðveldisins Íslands og 1. gr. skipulagslaga nr. 123/2010. Telur ráðið mikilvægt að þróunaráætlanir verði alltaf unnar á jafnræðisgrundvelli í nánu samstarfi við viðkomandi sveitarfélög en ekki sem miðstýrð fyrirmæli ofan frá. Jafnframt verður ríkið að bera fulla fjárhagslega og rekstrarlega ábyrgð á þeim tæknilegu innviðum sem eiga að koma í stað hefðbundinnar þjónustu, svo að sá kostnaður lendi ekki á herðum sveitarfélaga ef stafrænar lausnir eða netkerfi bregðast.

Að lokum leggur ráðið ríka áherslu á að áfram verði staðinn vörður um brothættar byggðir og sóknaráætlanir landshluta, en sú aðferðafræði hefur reynst afar vel við uppbyggingu í Húnaþingi vestra. Mikilvægt er að þessi farsælu verkefni verði áfram tryggð með fullnægjandi fjármögnun en ekki látin víkja fyrir almennari stefnumörkun eða miðlægari lausnum.

Ráðið vill sérstaklega vekja athygli á að tölfræði um þróun ríkisstarfa á árinu 2024 stangast með afgerandi hætti á við þau markmið hvítbókarinnar um jafna dreifingu opinberra starfa sem fram koma í aðgerðum B2 (Staðarval ríkisstarfa) og B3 (Óstaðbundin störf). Samkvæmt nýjustu skýrslu Byggðastofnunar, Hvar eru ríkisstörfin? Fjöldi ríkisstarfa 31.12.2024, fjölgaði stöðugildum á vegum ríkisins um 538 á landsvísu árið 2024, en þar af varð fjölgunin 491 stöðugildi á höfuðborgarsvæðinu einu, eða rúmlega 91% af allri landsfjölguninni. Höfuðborgarsvæðið hýsir nú 70,2% allra ríkisstarfa þótt þar búi 64% landsmanna, og bilið hefur farið vaxandi fremur en minnkandi. Á sama tíma fækkaði ríkisstöðugildum um átta eða fleiri í sjö sveitarfélögum, þar á meðal í Húnaþingi vestra, þar sem stöðugildum fækkaði um níu, eða 11,3%, sem er hlutfallslega ein mesta fækkunin á landinu öllu. Þessi eina árs fækkun þurrkar að mestu út þá fjölgun sem varð í sveitarfélaginu allt frá árinu 2014, þegar stöðugildi voru 64 talsins, upp í 80 árið 2023. Ráðið telur að þessi þróun endurspegli með skýrum hætti þann veruleika sem lýst er í umsögn Þórodds Bjarnasonar, að bein áhrif byggðaáætlunar á atvinnulíf birtist einkum í yfirlýstum markmiðum um jafnari dreifingu ríkisstarfa, á meðan framkvæmdin færir störfin í reynd nær eingöngu til höfuðborgarsvæðisins. Ráðið hvetur innviðaráðuneytið til að útfæra aðgerðir B2 og B3 með mælanlegum og bindandi viðmiðum, til dæmis um lágmarkshlutfall nýrra starfa utan höfuðborgarsvæðisins, svo að stefnan verði annað og meira en orðin tóm.

Byggðarráð tekur jafnframt í öðrum meginatriðum undir umsögn Þórodds Bjarnasonar sem birt er á samráðsgátt og hvetur innviðaráðuneytið til að taka tillit til þeirra við áframhaldandi vinnslu byggðaáætlunar.

8.Mál til umsagnar Forsamráð um efnistök grænbókar um fjarskipti og netöryggi mál nr. 105/2026

Málsnúmer 2606060 Vakta málsnúmer

Lögð fram umsagnarbeiðni frá innviðaráðuneytinu um mál nr. 105/2026 í samráðsgátt stjórnvalda, Forsamráð um efnistök grænbókar um fjarskipti og netöryggi.

Byggðarráð Húnaþings vestra fagnar því að innviðaráðuneytið leiti snemma eftir sjónarmiðum hagsmunaaðila og styður heilshugar þá samþættu nálgun sem lögð er til í forsamráðsskjali ráðuneytisins. Ráðið telur afar mikilvægt að fjarskipti og netöryggi séu meðhöndluð sem nátengdir og samofnir málaflokkar, enda er rekstraröryggi og áfallaþol fjarskiptainnviða undirstaða stafræns öryggis og trausts í nútímasamfélagi.

Varðandi kafla 6.2 um stöðu fjarskiptainnviða og næsta áfanga vill byggðarráð leggja ríka áherslu á að þótt opinber tölfræði sýni mikinn árangur í uppbyggingu og útbreiðslu háhraðafjarskiptaneta, gefa þær mælingar oft afbakaða mynd af raunveruleikanum. Mælingar á dreifikerfum og farnetsþekju eru gjarnan framkvæmdar við bestu mögulegu skilyrði á völdum stöðum, en staðan breytist til hins verra þegar komið er út fyrir þau svæði eða þegar notendur eru á ferðinni um dreifbýli, tengivegi og inn til dala. Íbúar og atvinnurekendur á landsbyggðinni búa víða við afar slæma og óáreiðanlega þjónustu, þrátt fyrir að opinberar skýrslur sýni fullnægjandi dekkun. Grænbókin verður að taka á þessu misræmi og tryggja að framtíðarstefna stjórnvalda byggi á raunhæfu og lifandi stöðumati en ekki einungis tæknilegum mælingum sem framkvæmdar eru við kjöraðstæður.

Þá vill byggðarráð gera alvarlegar athugasemdir við þau áform sem lýst er í kafla 6.4 um útfösun eldri fjarskiptakerfa. Það er skýr afstaða ráðsins að útfösun eldri kerfa megi aldrei eiga sér stað fyrr en fullkomlega er tryggt að nýrri kerfi, svo sem ljósleiðari eða 4G og 5G eða nýrri farnet, hafi náð nákvæmlega sömu eða betri landfræðilegri dekkun og áreiðanleika og eldri kerfin buðu upp á. Ekki má fella úr gildi eldri innviði á grundvelli þess að nýrri tækni sé tekin við ef hún nær ekki til allra sömu notenda og áður nutu þjónustunnar. Þetta á sérstaklega við um öryggisþætti, svo sem aðgengi að neyðarsímtölum í gegnum 112 og virkni öryggisbúnaðar og M2M-tækja í dreifbýli.

Í þessu samhengi bendir byggðarráð á rétt neytenda til alþjónustu samkvæmt 1. mgr. 62. gr. fjarskiptalaga nr. 70/2022, þar sem mælt er fyrir um að neytendum skuli tryggður aðgangur á viðráðanlegu verði að nothæfri netaðgangsþjónustu og símaþjónustu á lögheimili eða aðsetri. Þótt alþjónusta sé tæknióháð samkvæmt 2. mgr. 62. gr. sömu laga, má tæknileg útfösun eldri kerfa aldrei leiða til þess að íbúar í dreifðari byggðum standi eftir án raunhæfra samskiptatenginga. Jafnframt verður að virkja eftirlitsskyldu Fjarskiptastofu samkvæmt 3. mgr. 64. gr. sömu laga til að tryggja að fyrirhugaðar breytingar á aðgangsneti skerði ekki rétt landsbyggðarinnar til fullnægjandi fjarskiptaþjónustu. Sérstaklega þarf að líta til ríkra öryggisskyldna sem hvíla á fjarskiptafyrirtækjum samkvæmt XII. kafla fjarskiptalaga nr. 70/2022, sérstaklega 78. gr. laganna, þar sem áfallaþol og samfella mikilvægra innviða eru sett í forgrunn. Útfösun eldri kerfa má því aldrei rýra áfallaþol eða öryggisstig.

9.Félagsmálaráð - 271

Málsnúmer 2607008F Vakta málsnúmer

Fundargerð 271. fundar félagsmálaráðs frá 29. júlí 2026 lögð fram til afgreiðslu á 1285. fundi byggðarráðs eins og einstök erindi bera með sér. Formaður byggðarráðs kynnti fundargerð.

Fundargerðin borin undir atkvæði og samþykkt með 3 atkvæðum.

9.1 2602015 Félagsheimilið Hvammstanga - Innanhúshönnun

Félagsmálaráð - 271 Lagðar fram athugasemdir frá íbúafundi, fundi með hagaðilum og úr opnu samráði um tillögur að innanhússhönnun Félagsheimilisins Hvammstanga. Fjöldi athugasemda og ábendinga bárust. Félagsmálaráð fór yfir innkomnar ábendingar og athugasemdir og tók afstöðu til þeirra. Sviðsstjóra falið að koma niðurstöðu félagsmálaráðs til hönnuðar til að vinna málið áfram.
9.2 2607046 Frumvarpsdrög um breyttan útivistartíma barna

Félagsmálaráð - 271 Félagsmálaráð telur ekki ástæðu til að gera athugasemd við frumvarpið.
9.3 2601078 Helstu verkefni fjölskyldusviðs frá síðasta fundi 2026

Félagsmálaráð - 271 Lagt fram til kynningar.

10.Landbúnaðarráð - 225

Málsnúmer 2607006F Vakta málsnúmer

Fundargerð 225. fundar landbúnaðaráðs frá 5. ágúst 2026 lögð fram til afgreiðslu á 1285. fundi byggðarráðs eins og einstök erindi bera með sér. Formaður byggðarráðs kynnti fundargerð.

Aðrir liðir fundargerðarinnar og fundargerðin í heild sinni borin undir atkvæði og samþykkt með 3 atkvæðum.

10.1 2607005 Úthlutun til styrkvega 2026

Landbúnaðarráð - 225 Úthlutun ársins er kr. 4.000.000. Fjallskiladeildir hafa verið upplýstar um úthlutunina.
10.2 2607048 Úthlutun fjármuna til heiðaskála 2026

Landbúnaðarráð - 225 Landbúnaðarráð samþykkir samhljóða að dreifa fjármunum sem til úthlutunar eru jafnt á milli skála sem eru í umsjón fjallskiladeilda. Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.
10.3 2607049 Úthlutun fjármuna til viðhalds rétta 2026

Landbúnaðarráð - 225 Landbúnaðarráð samþykkir samhljóða að dreifa fjármunum til fjallskiladeilda í jöfnu hlutfalli við fjölda rétta í hverri deild.

Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.
10.4 2607066 Fyrirkomulag gæsaveiða í Húnaþingi vestra haustið 2026

Landbúnaðarráð - 225 Landbúnaðarráð samþykkir samhljóða að fyrirkomulag gæsaveiða 2026 verði með eftirfarandi hætti:

Veiðimönnum með gilt skotvopnaleyfi og veiðikort útgefið af veiðistjórnunarsviði Umhverfis- og orkustofnunar stendur til boða að kaupa sérstakt veiðileyfi útgefið af Húnaþingi vestra er veitir þeim einum heimild til gæsaveiða í eignarlöndum sveitarfélagins. Í boði er að kaupa leyfi á þremur svæðum;
a. Eignarhlutur Húnaþings vestra í Víðidalstunguheiði austan Víðidalsár ásamt jörðinni Öxnártungu.
b. Víðidalstunguheiði vestan Víðidalsár ásamt jörðunum Stóru-Hlíð, Stóra-Hvarfi og Króki.
c. Eignarhlutur Húnaþings vestra í Arnarvatnsheiði og Tvídægru.

Hvert veiðileyfi gildir þann dag sem tilgreindur er á viðkomandi leyfi og er útgefið innan þess gæsaveiðitíma sem umhverfisráðuneytið gefur út vegna ársins 2026. Leyfið veitir einungis skráðum handhafa þess heimild til veiða á umræddu svæði á áðurnefndum tíma. Um er að ræða sölu á dagsleyfum.

Leyfin verða til sölu hjá Hallfríði Ólafsdóttur í Víðidalstungu. Verð fyrir hvert leyfi er kr. 9.000 á dag.

Fjöldi veiðimanna á veiðisvæði er takmarkaður við 4 byssur á hverju svæði á dag. Veiðimenn eru hvattir til að tilkynna veiðar án leyfis til eftirlitsmanns.

Með vísan til 7. gr. fjallskilasamþykktar Húnaþings vestra er óheimilt að nýta hunda og flygildi (dróna) til veiða fyrr en fyrstu göngum á viðkomandi afrétti er lokið.

Í samræmi við 17. tölul. 1.mgr. 9. gr laga um vernd, friðun og veiðar á villtum fuglum og villtum spendýrum nr. 64/1994 er notkun á vélknúnum ökutækjum utan vega eða vegslóða bönnuð. Fjallskiladeildir í Húnaþingi vestra hafa heimild til að loka vegum og vegslóðum sem eru á forræði sveitarfélagsins án fyrirvara ef talið er að þeir liggi undir skemmdum vegna tíðarfars og umferðar. Veiðileyfið veitir því ekki tryggingu fyrir því að ávallt sé hægt að aka að veiðisvæði. Veiðileyfi eru ekki endurgreidd.

Þess er vænst að veiðimenn virði það fyrirkomulag sem hér er kynnt og viðurkenni að það sé sanngjarnt og eðlilegt að greiða hóflegt gjald fyrir aðgang að náttúruauðlindum. Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.
10.5 2607067 Fyrirkomulag rjúpnaveiða í Húnaþingi vestra haustið 2026

Landbúnaðarráð - 225 Landbúnaðarráð samþykkir samhljóða að fyrirkomulag rjúpnaveiða 2026 verði með eftirfarandi hætti:

Veiðimönnum með gilt skotvopnaleyfi og veiðikort útgefið af veiðistjórnunarsviði Umhverfis- og orkustofnunar stendur til boða að kaupa sérstakt veiðileyfi útgefið af Húnaþingi vestra er veitir þeim einum heimild til rjúpnaveiða í eignarlöndum sveitarfélagins. Í boði verða tvenns konar leyfi sem gefin verða út á jafnmörg svæði, en þau eru;
a) Eignarhlutur Húnaþings vestra í Víðidalstunguheiði ásamt jörðunum Króki, Stóru-Hlíð, Stóra-Hvarfi og eignarhlut Húnaþings vestra í Öxnártungu (svæði 1).
b) Eignarhlutur Húnaþings vestra í Arnarvatnsheiði og Tvídægru (svæði 2).

Hvert veiðileyfi sem selt er gildir á veiðitíma rjúpu sem umhverfisráðuneytið gefur út vegna ársins 2026 og veitir einungis skráðum handhafa þess heimild til veiða á umræddu svæði á áðurnefndum tíma. Um er að ræða sölu á dagsleyfum.

Veiðileyfin verða til sölu hjá Hallfríði Ólafsdóttur í Víðidalstungu. Verð fyrir hvert leyfi er kr. 15.000 á dag.

Fjöldi veiðimanna á veiðisvæði 1 er takmarkaður við 4 byssur á dag, en 5 byssur á svæði 2. Veiðimenn eru hvattir til að tilkynna veiðar án leyfis til eftirlitsmanns.

Í samræmi við 17. tölul. 1.mgr. 9. gr laga um vernd, friðun og veiðar á villtum fuglum og villtum spendýrum nr. 64/1994 er notkun á vélknúnum ökutækjum utan vega eða vegslóða bönnuð. Fjallskiladeildir í Húnaþingi vestra hafa heimild til að loka vegum og vegslóðum sem eru á forræði sveitarfélagsins án fyrirvara ef talið er að þeir liggi undir skemmdum vegna tíðarfars og umferðar. Veiðileyfið veitir því ekki tryggingu fyrir því að ávallt sé hægt að aka að veiðisvæði. Veiðileyfi eru ekki endurgreidd.

Þess er vænst að veiðimenn virði það fyrirkomulag sem hér er ákveðið og viðurkenni að það sé sanngjarnt og eðlilegt að greiða hóflegt gjald fyrir aðgang að náttúruauðlindum. Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.
10.6 2604078 Girðing í Víðidalsfjalli (Miðhóp og Þingeyrarselsland)

Landbúnaðarráð - 225 Um er að ræða fyrirspurn Húnabyggðar um áhuga Húnaþings vestra á endurnýjun girðingar á Víðidalsfjalli.

Landbúnaðarráð telur að sveitarfélaginu beri ekki skylda til þess að taka þátt í kostnaði við umrædda girðingu þar sem um einkalönd er að ræða Húnaþings vestra megin en ekki afrétt. Því hvíli engin almenn skylda á sveitarfélaginu til að taka þátt í kostnaði við viðgerðir eða lagfæringar á girðingunni á Víðidalsfjalli á merkjum Miðhóps og Þingeyrarselslands á grundvelli girðingalaga nr. 135/2001. Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.
10.7 2607068 Veiðieftirlit vegna gæsa- og rjúpnaveiða haustið 2026

Landbúnaðarráð - 225 Landbúnaðarráð samþykkir samhljóða að fela Júlíusi Guðna Antonssyni veiðieftirlit árið 2026 og samþykkir jafnframt framlagðan samning. Bókun fundar Afgreiðsla landbúnaðarráðs borin undir atkvæði og samþykkt með 3 atkvæðum.

11.Umhverfis-, veitu- og framkvæmdaráð - 2

Málsnúmer 2608001F Vakta málsnúmer

Fundargerð 2. fundar umhverfis-, veitu- og framkvæmdaráðs frá 6. ágúst 2026 lögð fram til afgreiðslu á 1285. fundi byggðarráðs eins og einstök erindi bera með sér. Formaður byggðarráðs kynnti fundargerð.