Hvammstangi

Hvammstangi er mjög aðlaðandi og snyrtilegur bær sem stendur við Miðfjörð um 6 km frá þjóðveginum. Hann er stærsti þéttbýliskjarni Húnaþings vestra með um 550 íbúa. Staðurinn byggðist upp í byrjun 20. aldar og á rúmlega 100 ára verslunarsögu. Margvíslega opinbera þjónustu og atvinnustarfsemi er að finna á Hvammstanga svo sem sundlaug og íþróttahús, öfluga heilsugæslu, lyfsölu, tannlæknaþjónustu, öldrunarheimili og þjónustuíbúðir. Á Hvammstanga er einnig aðsetur Fæðingarorlofssjóðs og þar er að finna banka, verkstæði, hárgreiðslustofur og bóka- og skjalasafn, svo eitthvað nefnt af fjölbreyttri þjónustu staðarins.

 Á Hvammstanga hefur einnig byggst upp margvísleg ferðaþjónusta. Á Selasetri Íslands er hægt að fræðast um seli við Ísland og þar er einnig upplýsingamiðstöð héraðsins. Bardúsa-Verslunarminjasafn er rekið í einu elsta húsi staðarins og þar er krambúð Sigurðar Davíðssonar frá því á fyrri hluta 20. aldar. Þar er selt vandað handverk úr héraðinu. Prjónastofan Kidka, ein stærsta prjónastofa landsins, býður í verslun sinni upp á úrval af prjónavöru sem bæði er hönnuð og framleidd á staðnum. Í bænum er veitingastaðurinn Sjávarborg sem er vinsæll bæði meðal heimafólks og ferðamanna. Margvísleg gistiaðstaða er í sveitarfélaginu, á Hvammstanga er meðal annars hótel, gistiheimili og hostel.  Í Kirkjuhvammi er skjólgott tjaldstæði þar sem er þægilegt þjónustuhús og tenging fyrir tjald- og húsvagna. Þar eru einnig vinsæl smáhýsi sem nýtast allt árið um kring.