Byggðarráð

1282. fundur 13. júlí 2026 kl. 14:00 - 15:05 í Ráðhúsinu
Nefndarmenn
  • Örn Arnarson formaður
  • Nína Axelsdóttir varaformaður
  • Viktor Ingi Jónsson aðalmaður var fjarverandi en í staðinn sat fundinn Magnús Vignir Eðvaldsson
Starfsmenn
  • Unnur Valborg Hilmarsdóttir sveitarstjóri
  • Elín Jóna Rósinberg sviðsstjóri fjármála- og stjórnsýslusviðs
Fundargerð ritaði: Elín Jóna Rósinberg
Dagskrá

1.Vinnuhópur um gerð aðalskipulags

Málsnúmer 2509085Vakta málsnúmer

Endurskipan í vinnuhóp um gerð aðalskipulags ásamt staðfestingu erindisbréfs hópsins.
Byggðarráð samþykkir samhljóða skipan eftirtalinna í starfshóp um gerð aðalskipulags:
Fríða Marý Halldórsdóttir, formaður
Ingveldur Linda Gestsdóttir,
Magnús Vignir Eðvaldsson.
Byggðarráð samþykkir jafnframt samhljóða erindisbréf hópsins.

2.Landsmót UMFÍ 50 á Hvammstanga

Málsnúmer 2607009Vakta málsnúmer

Lagt fram bréf frá Guðmundi Hauki Sigurðssyni og Flemming Jessen, dags. 3. júlí 2026, með áskorun um að sótt verði um að halda landsmót UMFÍ 50 ára og eldri á Hvammstanga.
Byggðarráð tekur vel í erindið og hvetur USVH ásamt ungmennafélögum á svæðinu til samstarfs sín á milli um verkefnið.

3.Mál til umsagnar: Drög að reglugerð um fjarheilbrigðisþjónustu mál nr. 107/2026

Málsnúmer 2606073Vakta málsnúmer

Lögð fram umsagnarbeiðni frá heilbrigðisráðuneytinu um mál nr. 107/2026 í samráðsgátt stjórnvalda, drög að reglugerð um fjarheilbrigðisþjónustu.
Byggðarráð Húnaþings vestra gerir í meginatriðum ekki athugasemdir við inntak reglugerðardraganna og markmið hennar. Ráðið vill hinsvegar benda á að rík auðkenningarkrafa getur komið í veg fyrir að viðkvæmasti notendahópurinn geti nýtt sér fjarheilbrigðisþjónustu. Vill ráðið þá einkum benda á þá sem nota fjarþjónustu í heimahúsum, svo sem eldri borgara, fólk með heilabilun, fólk með skerta hreyfigetu o.s.frv. Fyrir hluta þessara þjónustuþega getur auðkenning með rafrænum skilríkjum reynst þröskuldur sem erfitt er að komast yfir af ýmsum ástæðum. Ráðið tekur undir athugasemd þá sem fram kemur í umsögn Dala ehf. Þar sem segir:

„Reynslan af þeim lausnum sem þegar eru í notkun fyrir fjarinnlit sýnir að hagræðið og gæði þjónustunnar eru veruleg þegar fjarinnlit eru notuð í bland við hefðbundna heimaþjónustu. Sá ávinningur næst hins vegar aðeins ef notandinn kemst raunverulega inn í samtalið. Auðkenningarþröskuldur sem hentar vel í almennri fjarheilbrigðisþjónustu getur orðið að óyfirstíganlegri hindrun fyrir einmitt þann hóp sem fjarþjónustan á að styðja."

Byggðarráð vill jafnframt leggja áherslu á að fjarheilbrigðisþjónusta verði aldrei skilgreind sem sjálfgefinn eða fyrsti kostur við veitingu heilbrigðisþjónustu. Byggðarráð telur að meginreglan eigi ávallt að vera sú að einstaklingar eigi kost á þjónustu augliti til auglitis, óháð búsetu, en fjarþjónusta sé viðbót sem nýtt er þegar hún þjónar hagsmunum notandans. Sé þessari meginreglu ekki fylgt, er hætta á að íbúar landsbyggðarinnar búi við lakari aðgang að opinberri þjónustu en aðrir, og að stafræn þjónusta verði í reynd staðgengill fyrir þá nærþjónustu sem þeir eiga sama rétt á og aðrir landsmenn.

Stafrænar lausnir mega þannig aldrei verða réttlæting fyrir fækkun staðbundinna þjónustukosta eða veikingu heilbrigðisþjónustu á landsbyggðinni. Slík þróun myndi skapa tveggja þrepa heilbrigðiskerfi þar sem búseta ræður því hvort fólk á raunverulegan kost á þjónustu í persónu eða eingöngu í gegnum skjá.

4.Mál til umsagnar: Drög að reglugerð um heilsugæslu mál nr. 110/2026

Málsnúmer 2606088Vakta málsnúmer

Lögð fram umsagnarbeiðni frá heilbrigðisráðuneytinu um mál nr. 110/2026 í samráðsgátt stjórnvalda, drög að reglugerð um heilsugæslu.
Samkvæmt íbúakönnun Vífils Karlssonar sem gerð var 2023 eru íbúar í Húnaþingi vestra þeir ánægðustu á landinu með heilbrigðisþjónustu í sínu sveitarfélagi. Gera má ráð fyrir að gott aðgengi að reyndum heimilislæknum sem búsettir eru á svæðinu ásamt framúrskarandi heilbrigðisstarfsfólki öðru eigi stóran þátt í þeirri ánægju. Mikilvægt er að standa vörð um þá þjónustu sem í boði er í sveitarfélaginu og viðhalda ánægju íbúa. Byggðarráð fær ekki séð að þær breytingar sem boðaðar eru í reglugerðardrögunum séu til þess fallnar. Einkum vill ráðið vekja athygli á því að skráning fólks hjá þverfaglegu teymi í stað heimilislæknis er allt öðruvísi í framkvæmd á landsbyggðinni en á höfuðborgarsvæðinu þar sem aðgengi að sérfræðingum er mun meira en víðast hvar úti á landi. Ráðið telur að með þeirri breytingu sé ýtt undir lakari þjónustu á landsbyggðinni. Við það verður ekki unað.

Byggðarráð hvetur ráðherra til að taka til greina ábendingar reyndra heilsugæslulækna og annarra heilbrigðisstarfsmanna sem fram koma í umsögnum um málið og endurskoða reglugerðardrögin í heild sinni.

5.Ársreikningur 2025

Málsnúmer 2607003Vakta málsnúmer

Ársreikningur Ámundakinnar ehf. fyrir árið 2025 lagður fram til kynningar.

6.Landbúnaðarráð - 224

Málsnúmer 2604004FVakta málsnúmer

Fundargerð 224. fundar landbúnaðarráðs frá 1. júlí 2026 lögð fram til afgreiðslu á 1282. fundi byggðarráðs eins og einstök erindi bera með sér.
Formaður byggðarráðs kynnti fundargerð.
Aðrir liðir og fundargerðin í heild sinni borin undir atkvæði og samþykkt með 3 atkvæðum.
  • 6.1 2605065 Erindisbréf nefnda og ráða
    Landbúnaðarráð - 224
  • 6.2 2606087 Ákvörðun um fundartíma landbúnaðarráðs
    Landbúnaðarráð - 224 Landbúnaðarráð samþykkir samhljóða að fundir ráðsins verði alla jafna haldnir fyrsta miðvikudag í mánuði kl. 13 í fundasal Ráðhússins.
  • 6.3 2604078 Girðing í Víðidalsfjalli (Miðhóp og Þingeyrarselsland)
    Landbúnaðarráð - 224 Í erindinu kemur fram að um sé að ræða u.þ.b. 2,5 km girðingu og að mestu þurfi að skipta um net. Sveitarstjóra er falið að kanna skyldur sveitarfélagsins hvað málið varðar.
  • 6.4 2606051 Beiðni um leyfi til tínslu fjallagrasa
    Landbúnaðarráð - 224 Landbúnaðarráð samþykkir beiðnina samhljóða í samræmi við fyrirliggjandi reglur um fjallagrasanytjar í löndum Húnaþings vestra. Ráðið leggur áherslu á að tínsla hefjist ekki fyrr en að vegir hafi opnað og jafnframt að þeir sem tínsluna annast gangi vel um svæðið. Sveitarstjóra er falið að kalla eftir korti af svæðinu sem áætlað er að tínsla fari fram á. Bókun fundar Afgreiðsla byggðarráðs borin undir atkvæði og samþykkt með 3 atkvæðum.
  • 6.5 2602085 Styrkvegir 2026
    Landbúnaðarráð - 224 Ekki hefur borist tilkynning frá Vegagerðinni vegna úthlutunar styrkvegafjár á árinu 2026. Landbúnaðarráð harmar seinagang við úthlutunina. Nú er farið að líða á þann tíma sem er til framkvæmda og afleitt að töf verði á þeim vegna þessa. Framlag til styrkvega samkvæmt fjárhagsáætlun sveitarfélagsins er kr. 2.500.000 Eftirfarandi tillaga um skiptingu framlags sveitarfélagsins var samþykkt samhljóða:
    a) Til afréttavega á Víðidalstunguheiði kr. 833.333.
    b) Til afréttavega í Miðfirði kr. 733.333.
    c) Til afréttavega í Hrútafirði austur kr. 483.333.
    d) Til vegar ofan Hvammstanga upp á Vatnsnesfjall kr. 283.333.
    e) Brandagilsháls kr. 166.667.

    Fjallskilastjórnir sjá um framkvæmdir við styrkvegi á sínum svæðum, að veginum yfir Brandagilsháls undanskildum sem verður á ábyrgð sveitarstjóra.

    Landbúnaðarráð samþykkir samræmt gjald vegna vinnu við styrkvegina í sveitarfélaginu, þar sem gjald fyrir dráttarvél með vagni og manni verði að hámarki kr. 19.500 pr.klst. með vsk.

    Vinnu við styrkvegina skal vera lokið fyrir fyrstu göngur og lokafrestur til að skila inn reikningum vegna vinnunnar er 15. október nk. Fjallskilastjórnir skulu jafnframt skila greinargerð um framkvæmdir ársins til sveitarstjóra.

    Þegar framlag Vegagerðarinnar árið 2026 verður ljóst, verður því úhlutað í sama hlutfalli og framlagi sveitarfélagsins. Fjallskilastjórnir verða upplýstar um niðurstöðuna eins fljótt og auðið er.
     Bókun fundar Afgreiðsla byggðarráðs borin undir atkvæði og samþykkt með 3 atkvæðum.
  • 6.6 2606074 Ábendingar til sveitarfélaga vegna búfjárbeitar og ágangs búfjár
    Landbúnaðarráð - 224
  • 6.7 2604040 Reglugerð um flutning sauð- og geitfjár yfir varnarlínur, nr. 253/2026.
    Landbúnaðarráð - 224 Lagt fram til kynningar. Landbúnaðarráð þakkar greinargóðar upplýsingar.
  • 6.8 2606057 Fundargerð fjallskilastjórnar Miðfirðinga
    Landbúnaðarráð - 224
  • 6.9 2606058 Fundargerð fjallskilastjórnar Víðdælinga
    Landbúnaðarráð - 224
  • 6.10 2606086 Samningur um refaveiðar 2026-2028
    Landbúnaðarráð - 224 Nemur endurgreiðsluhlutfall Húnaþings vestra 20% af áætluðum kostnaði við veiðarnar. Á árinu 2026 að hámarki kr. 2.200.000.

7.Skipulagsráð - 287

Málsnúmer 2606009FVakta málsnúmer

Fundargerð 287. fundar skipulagsráðs frá 1. júlí 2026 lögð fram til afgreiðslu á 1282. fundi byggðarráðs eins og einstök erindi bera með sér.
Nína Axelsdóttir aðalmaður í skipulagsráði kynnti fundargerð.
Aðrir liðir og fundargerðin í heild sinni borin undir atkvæði og samþykkt með 3 atkvæðum.
  • 7.1 2605065 Erindisbréf nefnda og ráða
    Skipulagsráð - 287 Skipulagsráð tekur fyrir kynningu á erindisbréfi ráðsins og siðareglum kjörinna fulltrúa Húnaþings vestra og tekur erindisbréf ráðsins og siðareglur til eftirbreytni í störfum sínum.
  • 7.2 2606018 Br. ASK-Tengivirki í landi Reykja-skipulags-matslýsing
    Skipulagsráð - 287 Svæðið er í gildandi aðalskipulagi skilgreint sem landbúnaðarsvæði, en fyrirhuguð uppbygging kallar á að landnotkun verði breytt í iðnaðarsvæði. Samhliða aðalskipulagsbreytingu verður unnið nýtt deiliskipulag þar sem m.a. verður kveðið á um afmörkun lóða, byggingarreiti, aðkomu, lagnaleiðir, öryggissvæði, frágang og aðra skipulagsskilmála vegna mannvirkjanna.

    Skipulagsráð leggur til við sveitarstjórn að samþykkja að auglýsa og kynna skipulags- og matslýsingu vegna breytingar á Aðalskipulagi Húnaþings vestra 2014-2026 og gerðar nýs deiliskipulags fyrir tengivirki og spennistöð í landi Reykja við Laugarbakka.     Bókun fundar Afgreiðsla skipulagsráðs borin undir atkvæði og samþykkt með 3 atkvæðum.
  • 7.3 2605052 Strengvæðing í Hrútafirði - tilkynning um framkvæmd
    Skipulagsráð - 287 Fyrir liggur að framkvæmdaraðili hafi aflað nauðsynlegra umsagna og leyfa frá landeigendum, Vegagerðinni, Fiskistofu og Minjastofnun Íslands, eftir því sem við á.

    Skipulagsráð gerir ekki athugasemd við fyrirhugaða framkvæmd, enda verði unnið í samræmi við framlagða tilkynningu og meðfylgjandi gögn.     Bókun fundar Afgreiðsla skiplagsráðs borin undir atkvæði og samþykkt með 3 atkvæðum.
  • 7.4 2606078 Merkjalýsing, Staður - spennistöð
    Skipulagsráð - 287 Skipulagsráð leggur til við sveitarstjórn að samþykkja merkjalýsinguna og stofnun 20.m² lóðar úr landi Staðar, landnúmer L144048, undir spennistöð í Hrútafirði, samkvæmt framlagðri merkjalýsingu. Bókun fundar Afgreiðsla skipulagsráðs borin undir atkvæði og samþykkt með 3 atkvæðum.
  • 7.5 2606077 Merkjalýsing, Víðigerð - spennistöð
    Skipulagsráð - 287 Skipulagsráð leggur til við sveitarstjórn að samþykkja merkjalýsingu vegna stofnunar 40 m² lóðar úr landi Auðunnarstaða, landnúmer L144596, undir spennistöð, samkvæmt framlagðri merkjalýsingu og meðfylgjandi uppdrætti. Bókun fundar Afgreiðsla skipulagsráðs borin undir atkvæði og samþykkt með 3 atkvæðum.
  • 7.6 2605014 Umsókn um byggingarlóð
    Skipulagsráð - 287 Skipulagsráð tekur til umfjöllunar erindi sveitarstjórnar vegna beiðni Sjótækni ehf. um breytingu á deiliskipulagi við Hafnarbraut á Hvammstanga, í tengslum við fyrirhugaða uppbyggingu atvinnuhúsnæðis fyrir þaravinnslu á lóðunum Hafnarbraut 9 og 11.

    Skipulagsráð felur skipulagsfulltrúa að vinna málið áfram í samræmi við ákvæði skipulagslaga nr. 123/2010, kalla eftir nauðsynlegum gögnum frá umsækjanda og undirbúa tillögu að breytingu á deiliskipulagi svæðisins til frekari umfjöllunar ráðsins.
  • 7.7 2606052 Bakkatún 9, ósk um afnotarétt
    Skipulagsráð - 287 Skipulagsráð hafnar erindinu. Ráðið telur ekki rétt að heimila nýtingu svæðisins sem bílastæði þar sem svæðið er samkvæmt fyrirliggjandi skipulagsgögnum ætlað fyrir göngustíg og hluta af samgöngu- og útivistartengingu innan svæðisins. Bókun fundar Afgreiðsla skipulagsráðs borin undir atkvæði og samþykkt með 3 atkvæðum.
  • 7.8 2607001 DSK-Nestún-Hvammstanga
    Skipulagsráð - 287 Skipulagsráð leggur til við sveitarstjórn að samþykkja að skipulagslýsingin verði auglýst og kynnt í samræmi við 1. mgr. 40. gr. skipulagslaga nr. 123/2010. Umsagnaraðilum, íbúum og öðrum hagsmunaaðilum verði gefinn kostur á að koma á framfæri ábendingum og sjónarmiðum áður en tillaga að deiliskipulagi verður fullmótuð. Bókun fundar Afgreiðsla skipulagsráðs borin undir atkvæði og samþykkt með 3 atkvæðum.
  • 7.9 2607002 Dsk-Borðeyri
    Skipulagsráð - 287 Skipulagsráð leggur til við sveitarstjórn að samþykkja að skipulagslýsingin verði auglýst og kynnt í samræmi við 1. mgr. 40. gr. skipulagslaga nr. 123/2010. Umsagnaraðilum, íbúum og öðrum hagsmunaaðilum verði gefinn kostur á að koma á framfæri ábendingum og sjónarmiðum áður en tillaga að deiliskipulagi verður fullmótuð. Bókun fundar Afgreiðsla skipulagsráðs borin undir atkvæði og samþykkt með 3 atkvæðum.

Fundi slitið - kl. 15:05.

Var efnið á síðunni hjálplegt?