Byggðarráð

Í minnisblaðinu koma fram hugmyndir um breytingar á opnunartíma til að mæta breytingum á kjarasamningum með tilliti til styttingar vinnuviku. Byggðarráð þakkar starfshópnum vel unnin störf. Sveitarstjóra er falið að kostnaðargreina breytingarnar áður en afstaða er tekin til þeirra.

Byggðarráð fagnar verkefninu. Ráðið samþykkir framlagðan samning og felur sveitarstjóra undirritun hans.

Fulltrúi Húnaþings vestra verður Þorleifur Karl Eggertsson, oddviti sveitarstjórnar.

Byggðarráð þakkar erindið. Málið er í skoðun hjá tryggingarfélagi sveitarfélagsins.

Frumvarpið miðar að því öðru fremur að færa alla stefnumörkun og áætlanagerð á sviði samgöngu-, byggðamála og fjarskipta undir eitt ráð, stefnuráð, sem leysir af hólmi samgönguráð, byggðamálaráð og húsnæðis- og skipulagsráð. Byggðarráð Húnaþings vestra gerir alvarlegar athugasemdir við þau áform. Málefnasvið það sem heyra myndi undir nýtt stefnuráð er afar breitt sem getur komið niður á gæðum áætlana sökum skorts á sérþekkingu. Byggðarráð tekur heilshugar undir umsögn Byggðastofnunar þar sem varað er við að lögð verði af sérstök stefna í byggðamálum (byggðaáætlun). Það er mat ráðsins að með því að fella byggðaáætlun undir aðrar áætlanir ráðuneytisins sé lítið gert úr mikilvægi stefnumörkunar hins opinbera á sviði byggðamála þegar í raun þyrfti að gera slíkri stefnumótun enn hærra undir höfði en nú er gert. Byggðaáætlun hefur ótvírætt sannað gildi og mikilvægi sitt á undanförnum árum. Vinnulag við gerð hennar hefur aukinheldur reynst vel og hafa áætlanirnar notið stuðnings í meðferð Alþingis þvert á flokka. Það væri því að mati byggðarráðs stórt skref afturábak að rýra gildi áætlunarinnar með framangreindum hætti. Landsbyggðirnar mega ekki við slíkri afturför. Byggðarráð leggst gegn því að þessi hluti frumvarpsins nái fram að ganga. Ekki eru gerðar athugasemdir við breytingar sem lúta að aðlögun gildissviðs að breyttu málefnasviði ráðuneytisins.

Byggðarráð ítrekar umsögn sína um málið á fyrri stigum sem var svohljóðandi:

Byggðarráð fagnar áformum hins opinbera um að bæta gæði kostnaðarmats, þ.e. mats á hugsanlegum áhrifum frumvarpa, tillagna að stjórnvaldsfyrirmælum eða annarra stefnumarkandi ákvarðana af hálfu ríkisins á fjárhag sveitarfélaga. Sveitarfélögin hafa um langt skeið gagnrýnt skort þar á og fjölmörg dæmi um að kostnaðarmat sé ekki framkvæmt eða ekki fullnægjandi þegar það er gert, óljóst sé hvenær leita eigi umsagnar Sambands íslenskra sveitarfélaga og hvernig leyst skuli úr ágreiningi.

Það er mat Byggðarráðs Húnaþings vestra að nái frumvarpið fram að ganga geti það leitt af sér aukin fyrirsjáanleika í rekstri sveitarfélaga til framtíðar auk bættra samskipta ríkis og sveitarfélaga. Byggðarráð tekur jafnframt undir umsögn byggðarráðs Norðurþings þar sem fram kemur að komi í ljós að ekki hafi farið fram mat á fjárhagslegum áhrifum og ljóst að lagafrumvarp, stjórnvaldsfyrirmæli eða stefnumarkandi ákvarðanir ríkisins munu hafa fjárhagsleg áhrif á sveitarfélag eða sveitarfélög skal viðkomandi ráðherra eiga frumkvæði að viðeigandi ráðstöfunum sem geta m.a. falið í sér breytingu á fjármögnun eða þjónustukröfum.

Í Kerfisáætlun Landsnets er fjallað um þau verkefni sem áformuð eru á árabilinu 2025-2034. Þó öll uppbygging raforkukerfisins á landinu varði Húnaþing vestra er hér einkum fjallað um þrjú verkefni sem á áætluninni eru og að hluta eða öllu leyti eru innan sveitarfélagamarka Húnaþings vestra.

Laugarbakki - nýtt tengivirki
Um er að ræða byggingu nýs 132kV afhendingarstaðar í meginflutningskerfinu sem mun tengjast inn á Laxárvatnslínu 1 við Laugarbakka. Megintilgangur framkvæmdarinnar er að auka afhendingargetu á svæðinu til að koma til móts við framtíðarálagsaukningu. Byggðarráð fagnar framkvæmdinni enda möguleikar til atvinnuuppbyggingar sem krefjast orku engir á svæðinu fyrr en tengivirkið verður risið. Byggðarráð mælist til þess að leitað verði leiða til að flýta framkvæmdinni enn frekar en áformað er að hún fari fram á árunum 2027-2029.

Holtavörðuheiðarlína 1
Um er að ræða lagningu nýrrar 220kV loftlínu frá tengivirki á Klafastöðum að nýju tengivirki sem reist verður á Holtavörðuheiði. Verkefnið er hluti af endurnýjun byggðalínu og sem slíkt afar mikilvægt til að auka bæði afhendingargetu og -öryggi um land allt. Lítill hluti línunnar er innan sveitarfélagamarka Húnaþings vestra en þó ekki í löndum sveitarfélagsins. Byggðarráð lýsir sig fúst til samstarfs um allt það sem að sveitarfélaginu snýr í tengslum við framkvæmdina enda verkefnið afar mikilvægt fyrir landsmenn alla.

Holtavörðuheiðarlína 3
Um er ræða lagningu nýrrar 220kV loftlínu frá Blönduvirkjun í nýtt tengivirki á Holtavörðuheiði. Mun línan loka tengingu frá Fljótsdal að Klafastöðum og er því mikilvægur hluti af nýrri kynslóð byggðalínu með það að markmiði að auka afhendingargetu og -öryggi um land allt. Fyrir liggja tveir meginvalkostir um lagningu línunnar. Byggðarráð vísar til umsagnar um umhverfismatsskýrslu um verkefnið dags. 17. febrúar 2025 þar sem áhersla er lögð á að farin verði svokölluð heiðaleið en hún liggur að stórum hluta um lönd sveitarfélagsins sem einfaldar framkvæmdina verulega.