Lok lóðarleigusamnings vegna Norðurbrautar 32

Lagt fram bréf Lagastoðar, dags. 8. maí 2024, ásamt fylgiskjölum þar sem fram kemur krafa húseiganda Norðurbrautar 32 um greiðslu vegna eignarinnar. Einnig lagt fram bréf Landslaga, dags. 14. maí 2024 þar sem kröfu húseiganda er hafnað og fyrra tilboð sveitarfélagsins er ítrekað. Frestur til að rýma eignina er framlengdur um mánuð til viðbótar við þá þrjá mánuði sem þegar höfðu verið gefnir.

Byggðarráð staðfestir þá afstöðu sem fram kemur í bréfi Landslaga dags. 14. maí 2024 um uppgjör og skil lóðarinnar í samræmi við niðurstöðu matsgerðar óháðra matsmanna líkt og kveðið er á um í lóðarleigusamningi. Auk þess býður sveitarfélagið að niðurrif og förgun eignarinnar verði á þess kostnað ásamt því að það sjái um að fjarlægja steyptar þrær og malarhaug við steypusíló, einnig á sinn kostnað. Sveitarstjóra er falið að ljúka málinu í samræmi við það í samvinnu við lögmann sveitarfélagsins.

Ferli málsins er að lóðarleigusamningur lóðarinnar rann út 28. janúar 2024. Þar sem eignin samræmist ekki gildandi deiliskipulagi frá 2012 og áformuð er íbúðauppbygging á reitnum var húseiganda tilkynnt að lóðarleigusamningur yrði ekki endurnýjaður og boðið fasteignamat sem greiðslu fyrir eignina í janúar 2023. Því hafnaði húseigandi og voru því kvaddir til dómkvaddir matsmenn sem báðir málsaðilar sammæltust um til að meta sannvirði hússins að teknu tilliti til ástands þess í samræmi við lóðarleigusamninginn. Mat þeirra lá fyrir í febrúar 2024 og var húseiganda boðið verð í samræmi við matið auk þess að sveitarfélagið tæki á sig kostnað við niðurrif og förgun eignarinnar ásamt því að fjarlægja steyptar þrær og malarhaug við steypusíló. Var gefinn þriggja mánaða frestur til að rýma eignina, til 15. maí 2024. Húseigandi kvaddi hins vegar til matsmenn til að meta endurstofnverð eignanna á lóðinni, jarðvegsskipti og sokkinn kostnað og gerði kröfu um greiðslu í samræmi við það. Þeirri kröfu hafnar sveitarfélagið þar sem hún endurspeglar ekki sannvirði hússins og gengur því lengra en lóðarleigusamningur segir til um.

Áður á dagskrá 1214. fundar byggðarráðs sem haldinn var þann 22. maí sl. þar sem ferli málsins er rakið. Fulltrúar sveitarfélagsins funduðu með eigenda eignarinnar að Norðurbraut 32 og fulltrúum hans í júní sl. Í framhaldi var farið heildstætt yfir málið. Samþykkt er að leggja fram lokatilboð til uppgjörs í tilefni af lokum lóðarleigusamninga auk ítrekunar á boði um niðurrif og förgun eignarinnar og að fjarlægja þrær og malarhaug við steypusíló að Norðurbraut 32. Gefinn verður lokafrestur til að rýma eignina. Lögmönnum sveitarfélagsins er falið að vinna málið áfram með sveitarstjóra.

Byggðarráð samþykkir að fela lögmönnum sveitarfélagsins að svara tilboði eiganda eignarinnar að Norðurbraut 32 í samræmi við minnisblaðið.

Hljóðar tilboðið upp á kr. 83.326.464 sem er miðgildi síðastu tilboða Húnaþings vestra og eiganda eignarinnar.

Lögð fram eftirfarandi tillaga:

„Byggðarráð samþykkir framlagt tilboð, með þeim skilyrðum að uppgjör fari fram í einu lagi og að eigandi rými húsnæðið og allt annað lausafé og mannvirki á lóðinni innan þriggja mánaða frá staðfestingu sveitarstjórnar. Sveitarfélagið tekur að sér að fjarlægja húsið, niðurgrafnar þrær og efnishaug við síló á lóðinni. Byggðarráð felur sveitarstjóra að ganga frá samningi í samræmi við framangreint í samvinnu við lögmenn sveitarfélagsins.“

Tillagan borin undir atkvæði og samþykkt með 2 atkvæðum. Magnús Vignir Eðvaldsson sat hjá við afgreiðslu málsins.

Lagt fram tilboð eiganda húseignar að Norðurbraut 32 vegna loka lóðarleigusamnings.
Hljóðar tilboðið upp á kr. 83.326.464 sem er miðgildi síðustu tilboða Húnaþings vestra og eiganda eignarinnar.

Lögð fram eftirfarandi tillaga:

„Sveitarstjórn samþykkir framlagt tilboð, dags. 14. október 2025, með þeim skilyrðum að uppgjör fari fram í einu lagi og að eigandi afhendi húsnæðið og alla lóðina sem hann hefur haft til umráða eigi síðar en 2. febrúar 2026. Sveitarfélagið eignast húsið og allt annað sem á lóðinni stendur á afhendingardegi. Sveitarstjórn felur sveitarstjóra að ganga frá samningi í samræmi við framangreint í samvinnu við lögmenn sveitarfélagsins.“

Tillagan borin undir atkvæði og samþykkt með 5 atkvæðum. Magnús Vignir Eðvaldsson og Viktor Ingi Jónsson sátu hjá við afgreiðslu málsins.