Aðalskipulag Húnaþing vestra 2026-2038

Skipulags- og umhverfisráð leggur til við sveitarstjórn að hafin verði vinna við heildarendurskoðun aðalskipulags sveitarfélagsins fyrir tímabilið 2026-2038 í samræmi við ákvæði skipulagslaga nr. 123/2010.

Ráðið telur mikilvægt að vinna við endurskoðun aðalskipulags verði hafin með formlegum hætti, þar sem tekið verði mið af þróun sveitarfélagsins, framtíðarsýn og samfélagslegum áskorunum. Jafnframt verði lögð áhersla á samráð við íbúa, hagsmunaaðila og opinberar stofnanir í samræmi við lög og bestu skipulagsvenjur.

Ráðið felur skipulagsfulltrúa að leggja fram tillögu að verkáætlun fyrir endurskoðunarferlið.

Sameiginlegur fundur Skipulags- og umhverfisráðs og sveitarstjórnar Húnaþings vestra sem var haldinn í Ráðhúsi Húnaþings vestra um heildarendurskoðun Aðalskipulags Húnaþings vestra 2026-2038.

Á fundinum voru fluttar yfirgripsmiklar og faglegar kynningar af fulltrúum ráðgjafarfyrirtækjanna Landmótunar, Eflu og Verkís um stöðu vinnunnar og helstu áherslur í endurskoðun aðalskipulagsins.

Skipulags- og umhverfisráð og sveitarstjórn þakka fyrir vandaða og faglega kynningu um vinnu og ferli um stefnumótun aðalskipulags sveitarfélagsins.

Skipulags- og umhverfisráð hefur farið yfir val á ráðgjöfum fyrir heildarendurskoðun aðalskipulags Húnaþings vestra 2026-2038. Á fundi ráðsins voru kynningar frá ráðgjöfum Landmótunar, Verkís og Eflu, sem allar voru mjög faglegar og upplýsandi sem kynntar voru á sameiginlegum fundi ráðsins og sveitarstjórn þann 26.03.2025.

Eftir vandlega yfirferð og samanburð á fyrirliggjandi valkostum er það mat ráðsins að samið verði við Landmótun um verkefnið.

Helstu rök fyrir þessari niðurstöðu eru eftirfarandi:

1) Fagleg kynning og skýr framsetning á aðferðarfræði.
Landmótun kynnti á faglegan og skýran hátt þá nálgun sem fyrirtækið leggur til grundvallar í skipulagsvinnu. Í kynningunni var lögð áhersla á stefnumótandi hugsun, ítarlega greiningu og vandaða stefnumótun sem tryggir gott aðalskipulag til framtíðar.

2) Áhersla á samráð og gegnsæja vinnsluaðferð
Í framsetningu ráðgjafans kom skýrt fram hvernig samráð við hagsmunaaðila, íbúa og sveitarfélagið verði háttað í vinnuferlinu. Mikilvægi gagnsæis í ferlinu var sérstaklega tekið fram, sem er lykilatriði í skipulagsvinnu af þessari stærðargráðu.

3) Góð yfirsýn yfir viðfangsefnið og sérsniðnar lausnir.
Landmótun sýndi fram á góða yfirsýn yfir þær áskoranir sem fylgja endurskoðun aðalskipulags Húnaþings vestra. Einnig var lögð áhersla á að laga vinnuferlið að þörfum sveitarfélagsins með hliðsjón af bæði staðbundnum aðstæðum og langtímasýn fyrir þróun byggðar og landnýtingar.

4) Reynsla og þekking á sambærilegum verkefnum.
Landmótun hefur yfir að ráða víðtækri reynslu og sérfræðiþekkingu á sviði skipulagsmála og hefur unnið að sambærilegum verkefnum fyrir önnur sveitarfélög. Ráðið metur það sem mikilvægt að ráðgjafinn hafi sýnt fram á árangursríka nálgun í fyrri verkefnum sem nýtist við heildarendurskoðun aðalskipulags Húnaþings vestra 2026-2038.

Að teknu tilliti til framangreindra atriða telur skipulags- og umhverfisráð rétt að fela Landmótun verkefnið og leggur til við sveitarstjórn að samþykkja valið og ganga til samninga á grundvelli þess.

Ráðið þakkar ráðgjöfunum fyrir mjög faglega og upplýsandi kynningu á verkefninu.