Þjóðarsátt um verðstöðugleika

Í erindinu óskar sambandið eftir skriflegu svari við því hvort sveitarfélagið sé reiðubúið að taka þátt í þjóðarsátt um verðstöðugleika og sjá til þess að gjaldskrár sveitarfélagsins og fyrirtækja í eigu þess hækki ekki um meira en 2,5% það sem eftir lifir gildandi kjarasamninga.

Í vinnu við gerð fjárhagsáætlunar ársins 2027 er gert ráð fyrir að gjaldskrár standi í stað milli ára. Með því móti er sveitarfélagið að koma til móts við alla íbúa og leggja sitt á vogarskálarnar til að skapa stöðugleika í landinu. Því er stefnt að því að gera gott betur en það sem Starfsgreinasambandið skorar á sveitarfélagið að gera í erindinu. Húnaþing vestra tekur að sjálfsögðu þátt í þjóðarsátt í framhaldinu ef til þess kemur að almenn sátt náist um það. Slík sátt kallar á samkomulag allra, atvinnulífs og opinberra aðila. Því var framlagning fjárlaga nú nýverið mikil vonbrigði með þeim skattahækkunum sem þar eru boðaðar og ekki eru til þess fallnar að skapa þjóðarsátt. Sveitarfélagið skorar jafnframt á einkaaðila að halda gjaldskrárhækkunum sínum í lágmarki því ekki gengur til lengdar að sveitarfélagið láti sínar gjaldskrár standa í stað eða haldi hækkunum í lágmarki ef sú þjónusta sem það kaupir af öðrum hækkar stöðugt.