Fyrirspurnir vegna kjarasamninga

Eftirfarandi spurningar eru settar fram í erindinu.

Mun Húnaþing vestra endurskoða fyrirhugaðar eða þegar samþykktar gjaldskrárhækkanir og leita leiða til að lækka gjöld sem hafa mest áhrif á barnafjölskyldur og viðkvæma hópa?
Svar: Í vinnu við gerð fjárhagsáætlunar ársins 2027 er gert ráð fyrir að gjaldskrár standi í stað milli ára. Með því móti er sveitarfélagið að koma til móts við alla íbúa og leggja sitt á vogarskálarnar til að skapa stöðugleika í landinu. Því er ekki þörf á endurskoðun fyrirhugaðra gjaldskrárhækkana, það stóð aldrei til að hækka gjaldskrár.

Hvaða aðgerðir hyggst Húnaþing vestra ráðast í til að tryggja nægilegt framboð lóða og hraðari uppbyggingu íbúðarhúsnæðis?
Svar: Nú þegar er nægilegt framboð lóða í samræmi við þá þörf sem fram kemur í húsnæðisáætlun sveitarfélagsins. Sveitarfélagið hefur jafnframt stuðlað að uppbyggingu íbúðarhúsnæðis með mjög myndarlegum hætti undanfarin ár, nú síðast með byggingu 10 íbúða húss sem tekið var í notkun í sumar með stofnframlagi og samstarfi við leigufélagið Brák. Sveitarfélagið var þriðja sveitarfélagið á landinu sem skilgreindi framlag sitt til aukins framboðs íbúðarhúsnæðis innan rammasamnings milli ríkis og sveitarfélaga árið 2024.

Hvernig hyggst Húnaþing vestra leggja sitt af mörkum til að brúa bilið milli fæðingarorlofs og leikskóla?
Svar: Í Húnaþingi vestra komast börn inn á leikskóla við 12 mánaða aldur. Engir biðlistar eru eftir leikskólaplássum. Sveitarfélagið hefur því þegar brúað bilið milli fæðingarorlofs og leikskóla og það fyrir löngu.

Hvaða aðrar aðgerðir telur Húnaþing vestra mögulegar til að draga úr kostnaðarhækkunum heimila og styðja við markmið kjarasamninganna um verðstöðugleika?
Framlagning fjárlaga nú nýverið voru mikil vonbrigði ef litið er til stöðugleika í þjóðfélaginu. Að mati byggðarráðs væri mikilvægasta aðgerðin til að draga úr kostnaðarhækkunum heimila og stuðla að verðstöðugleika að hið opinbera drægi til baka fyrirhugaðar skattahækkanir sem munu bitna verst á heimilunum í landinu og stuðla að áframhaldandi hárri verðbólgu og háu vaxtastigi.