Starfshópur um byggingu björgunarmiðstöðvar

Uppi hafa verið hugmyndir um byggingu björgunarmiðstöðvar til að leysa úr húsnæðisvanda slökkviliðs en í henni gæti jafnframt verið aðstaða fyrir sjúkrabíla og lögreglu ásamt björgunarsveit. Byggðarráð samþykkir að skipaður verði starfshópur um verkefnið og samþykkir jafnframt erindisbréf hópsins. Gert er ráð fyrir að í hópnum sitji fulltrúi meirihluta í sveitarstjórn sem jafnframt verði formaður, fulltrúi minnihluta í sveitarstjórn, slökkviliðsstjóri, skipulags- og byggingafulltrúi og fulltrúi Björgunarsveitarinnar Húna. Með hópnum mun starfa sviðsstjóri umhverfis-, veitu- og framkvæmdasviðs. Sveitarstjóra er falið að kalla eftir tilnefningum í hópinn.

Lögð fram eftirfarandi tillaga:

„Sveitarstjórn samþykkir erindisbréf starfshóps um byggingu björgunarmiðstöðvar og skipan eftirtalinna aðila í hópinn:
Ingimar Sigurðsson, formaður skipulags- og umhverfisráðs sem jafnframt er formaður.
Magnús Vignir Eðvaldsson, fulltrúi minnihluta í sveitarstjórn.
Valur Freyr Halldórsson, slökkviliðsstjóri.
Bogi Kristinsson Magnusen, skipulags- og byggingafulltrúi.
Gunnar Örn Jakobsson Skjóldal, fulltrúi Björgunarsveitarinnar Húna.“

Tillagan borin undir atkvæði og samþykkt með 7 atkvæðum.

Starfshópurinn er afar jákvæður fyrir byggingu björgunarmiðstöðvar og telur að slík bygging myndi nýtast og styrkja starf allra viðbragðsaðila á svæðinu.
Byggðarráð samþykkir að fela sveitarstjóra að óska eftir tilboðum í fullnaðarhönnun hússins ásamt kostnaðargreiningu áður en ákvörðun verður tekin um hvort ráðist verði í framkvæmdina. Sveitarstjóra er einnig falið að sækja um lóðina Höfðabraut 36 fari svo að tekin verði ákvörðun um að ráðast í bygginguna.
Byggðarráð þakkar starfshópnum og þeim aðilum sem að vinnu hópsins komu fyrir vel unnin störf.