Úttekt á starfsemi umhverfis-, veitu- og framkvæmdasviðs

Lagt fram minnisblað vegna úttektar á rekstri umhverfis-, veitu- og framkvæmdasviðs Húnaþings vestra. Tilgangur úttektarinnar er m.a. að greina núverandi skipulag sviðsins, ferla og verkaskiptingu, leggja mat á mönnunar-, húsnæðis- og tækjaþörf og leggja fram tillögur að umbótum þar sem þess gerist þörf. Byggðarráð samþykkir að ráðist verði í úttekt í samræmi við framkomið minnisblað og felur sveitarstjóra að leita tilboða í úttektina hjá til þess bærum aðilum sem byggðarráð tekur afstöðu til í framhaldinu. Úttektin er liður í áherslu sveitarstjórnar á stöðugar umbætur, hátt þjónustustig og góða nýtingu fjármuna. Fjölskyldusvið fór í gegnum sambærilega úttekt fyrir nokkrum árum og var í framhaldinu ráðist í breytingar á sviðinu sem hafa leitt til markvissara og faglegra starfs.

Svör við verðfyrirspurn bárust frá KPMG, HLH ráðgjöf og Strategíu. Að undangegnu mati á nálgun verkefnisins, reynslu af sambærilegum verkefnum og verði samþykkir byggðarráð að fela KPMG vinnslu úttektarinnar. Áætlaður kostnaður er 3,4-4,2 milljónir. Sveitarstjóra er falið að vinna málið áfram.

Ráðið leggur til, sem viðbragð við úttektarskýrslu, að breyta skilgreiningu starfa innan sviðsins: Í stað leiðtoga veitna komi starf forstöðumanns framkvæmda og veitna sem verði verkstjóri áhaldahúss. Undir honum starfi svo starfsmaður veitna, umsjónarmaður fasteigna og umsjónarmaður hafna og Hirðu. Breytingin fjölgi ekki störfum þar sem gert var ráð fyrir þessum fjórum störfum innan áhaldahússins og sú tala verði óbreytt. Með þessu vonast ráðið til þess að skýrari verkaskipting verði innan sviðsins með skilgreindum hlutverkum og ábyrgð starfsmanna. Ráðið felur sviðsstjóra að leggja fram aðgerðaráætlun í samræmi við niðurstöðu skýrslunnar á næsta fundi ráðsins.